ஜூனியர் ஹாக்கி போட்டி – ஜப்பானை வீழ்த்தி ஹாட்ரிக் வெற்றி பெற்றது இந்தியா

6 அணிகள் இடையிலான 8-வது சுல்தான் ஜோஹர் கோப்பைக்கான ஜூனியர் ஆக்கி போட்டி மலேசியாவில் நடந்து வருகிறது. இதில் நேற்று நடந்த லீக் ஆட்டம் ஒன்றில் இந்திய அணி, ஜப்பானை எதிர்கொண்டது. விறுவிறுப்பான இந்த ஆட்டத்தில் இந்திய அணி 1-0 என்ற கோல் கணக்கில் ஜப்பானை வீழ்த்தி ‘ஹாட்ரிக்’ வெற்றியை ருசித்தது.

வெற்றிக்கான கோலை இந்திய அணி வீரர் மன்தீப் மோர் 42-வது நிமிடத்தில் பெனால்டி கார்னர் வாய்ப்பை பயன்படுத்தி அடித்தார். இந்திய அணி முந்தைய ஆட்டங்களில் மலேசியா மற்றும் நியூசிலாந்து அணிகளை வென்று இருந்தது. இந்த வெற்றியின் மூலம் இந்திய அணி தனது இறுதிப்போட்டி வாய்ப்பை பிரகாசப்படுத்தியது. இந்திய அணி இன்று நடைபெறும் லீக் ஆட்டத்தில் ஆஸ்திரேலியாவை சந்திக்கிறது.