மத மற்றும் ஜாதி அரசியல் நாட்டுக்கு சரியானதல்ல – குலாம் நபி ஆசாத்

தலைநகர் டெல்லியில் குடியரசு தலைவர் மாளிகையில் நடைபெற்ற பத்ம விருதுகள் வழங்கும் நிகழ்ச்சியில், பொது விவகாரத் துறையில் சிறப்பாக செயல்பட்டதற்காக காங்கிரஸ் மூத்த தலைவர்
குலாம் நபி ஆசாத்திற்கு, குடியரசுத் தலைவர் ராம்நாத் கோவிந்த் பத்மபூஷன் விருதை வழங்கி கௌரவித்தார்.

பின்னர் ஏஎன்ஐ செய்தி நிறுவனத்திற்கு குலாம்நபி ஆசாத் அளித்துள்ள பேட்டியில் தெரிவித்துள்ளதாவது:

ஒருவரின் வேலையை நாடு அல்லது அரசு அங்கீகரிக்கும் போது அது நன்றாக இருக்கும். எனது துறையில் சிறப்பாக செயல்பட நான் எப்போதும் ஆவலுடன் இருக்கிறேன். யாரோ என் வேலையை
அங்கீகரித்ததை நான் விரும்புகிறேன்.

எனது வாழ்க்கையின் பல்வேறு கட்டங்களில் ஏற்ற தாழ்வுகளின் போது கூட, சமூக அல்லது அரசியல் துறையில் அல்லது ஜம்மு காஷ்மீர் (முன்னாள்) முதல்வராக இருந்தாலும், மக்களுக்காக நான்
எப்போதும் பாடுபட்டேன்.

இதைக் கருத்தில் கொண்டு, அரசும், நாட்டு மக்களும் வழங்கிய விருதில் மகிழ்ச்சி அடைகிறேன்.

சிலர் எப்போதுமே இதுபோன்ற விருதுகள் ஏன் வழங்கப்படுகின்றன, யாருக்கு வழங்கப்படுகின்றன என்றே பார்க்க முயற்சிப்பார்கள். இந்த விருதை அடைவதற்கான நபரின் செயல்முறை மற்றும்
பங்களிப்பை அவர்கள் அங்கீகரிக்கவில்லை. இந்த விருதை தேசம் எனக்கு வழங்கியது.

காந்திஜியிடம் இருந்து உண்மையைப் பேசக் கற்றுக்கொண்டோம். நாட்டின் ஒற்றுமைக்காகவும், ஒருமைப்பாட்டிற்காகவும் உண்மையைப் பேசினேன். மத அரசியலும், ஜாதி அரசியலும் நாட்டுக்கு
சரியானதல்ல. காந்திஜி தனது வாழ்நாள் முழுவதும் இதற்காக உழைத்தார், இறுதியில் அவர் தனது உயிரையும் கொடுத்தார்.

காந்திஜி இப்போது இல்லை, ஆனால் அவரது வாழ்க்கை மற்றும் அவரது கொள்கைகள் மறைந்து விடவில்லை. இவ்வாறு அவர் தெரிவித்தார்.