உலகக்கோப்பை கிரிக்கெட் லீக் – இன்று பாகிஸ்தான், தென் ஆப்பிரிக்கா மோதல்

உலக கோப்பை கிரிக்கெட் திருவிழாவில் லண்டன் லார்ட்சில் இன்று நடக்கும் 30-வது லீக் ஆட்டத்தில் பாகிஸ்தான்-தென்ஆப்பிரிக்கா அணிகள் மோதுகின்றன. புகழ்பெற்ற லார்ட்ஸ் மைதானத்தில் நடப்பு தொடரில் நடக்கும் முதல் ஆட்டம் இது தான்.

சர்ப்ராஸ் அகமது தலைமையிலான பாகிஸ்தான் அணி 5 ஆட்டங்களில் விளையாடி ஒரு வெற்றி, 3 தோல்வி, ஒரு முடிவில்லை என்று 3 புள்ளியுடன் பட்டியலில் 9-வது இடம் வகிக்கிறது. இந்தியாவுக்கு எதிரான ஆட்டத்தில் 89 ரன் வித்தியாசத்தில் படுதோல்வி அடைந்ததால் கடும் விமர்சனத்திற்குள்ளானது பாகிஸ்தான் அணி.

அரையிறுதி வாய்ப்பில் நீடிக்க வேண்டுமெனில் இன்றைய ஆட்டத்தில் வெற்றி பெற்றாக வேண்டும் என்ற கட்டாயத்தில் பாகிஸ்தான் அணி களமிறங்க உள்ளது.

பாகிஸ்தான் அணியின் பேட்டிங்கில் பஹார் ஜமான், இமாம் உல்-ஹக், பாபர் அசாம், முகமது ஹபீஸ் ஆகியோர் மட்டுமே நம்பிக்கை அளித்து வருகின்றனர். மூத்த வீரர் சோயிப் மாலிக் தொடர்ந்து சொதப்புவதால் அவருக்கு பதிலாக ஹாரிஸ் சோகைல் சேர்க்கப்படலாம். பந்துவீச்சில் முகமது அமிர் (13 விக்கெட்) தவிர மற்றவர்கள் தடுமாறுகிறார்கள்.

பாப் டு பிளிஸ்சிஸ் தலைமையிலான தென்ஆப்பிரிக்க அணி 6 ஆட்டங்களில் விளையாடி ஒரு வெற்றி, 4 தோல்வி, ஒரு முடிவில்லை என்று 3 புள்ளி மட்டுமே பெற்று இருக்கிறது. கிட்டத்தட்ட அடுத்து சுற்று வாய்ப்பை பறிகொடுத்து விட்ட தென்ஆப்பிரிக்க அணி, எஞ்சிய 3 ஆட்டங்களிலும் வெற்றி பெற்று ரன்ரேட்டில் ஏற்றமும், மற்ற ஆட்டங்களின் முடிவு எல்லா வகையில் சாதகமாகவும் அமைந்தால் ஒரு வேளை அதிர்ஷ்டம் அடிக்கலாம்.

தென்ஆப்பிரிக்காவின் பந்து வீச்சு மிரட்டலாக இருந்தாலும், பேட்டிங்கில் ஒருங்கிணைப்பு இல்லை. ஒவ்வொரு ஆட்டத்திலும் ஒரு சிலரே கணிசமாக ரன்கள் எடுக்கிறார்கள். அந்த அணியில் எந்த ஒரு வீரரும் ஒரு சதம் கூட அடிக்கவில்லை என்பதே அவர்களின் பலவீனமாக தெரிகிறது.

போட்டிக்கான இரு அணிகளின் உத்தேச பட்டியல் வருமாறு:-

தென்ஆப்பிரிக்கா: குயின்டான் டி காக், அம்லா, பாப் டு பிளிஸ்சிஸ் (கேப்டன்), மார்க்ராம், வான்டெர் துஸ்சென், டேவிட் மில்லர், பெலக்வாயோ, கிறிஸ் மோரிஸ், ரபடா, இம்ரான் தாஹிர், நிகிடி.

பாகிஸ்தான்: இமாம் உல்-ஹக், பஹார் ஜமான், பாபர் அசாம், முகமது ஹபீஸ், சர்ப்ராஸ் அகமது (கேப்டன்), ஹாரிஸ் சோகைல், இமாத் வாசிம், ஷதப் கான், ஹசன் அலி அல்லது ஷகீன் அப்ரிடி, வஹாப் ரியாஸ், முகமது அமிர்.

இந்திய நேரப்படி பிற்பகல் 3 மணிக்கு தொடங்கும் இந்த ஆட்டத்தை ஸ்டார் ஸ்போர்ட்ஸ் சேனல் நேரடி ஒளிபரப்பு செய்கிறது.

Leave a Reply

Your email address will not be published. Required fields are marked *