ஆஸ்திரேலியாவுக்கு எதிரான கடைசி டெஸ்ட்! – இரட்டை சதத்தை தவறவிட்ட புஜாரா

ஆஸ்திரேலியா – இந்தியா இடையில் நான்கு போட்டிகள் கொண்ட டெஸ்ட் கிரிக்கெட் தொடர் நடைபெற்று வருகிறது. அடிலெய்டு மற்றும் மெல்போர்ன் டெஸ்டில் இந்தியா வெற்றி பெற்றது. பெர்த் டெஸ்டில் ஆஸ்திரேலியா வெற்றி பெற்றது. 4-வது மற்றும் கடைசி டெஸ்ட் சிட்னியில் நேற்று தொடங்கி நடைபெற்று வருகிறது.

இந்த தொடரில் 3-வது வீரராக களமிறங்கி விளையாடி வரும் புஜாரா அபாரமான ஆட்டத்தை வெளிப்படுத்தி வருகிறார். அடிலெய்டு மற்றும் மெல்போர்ன் டெஸ்டில் சதம் அடித்த புஜாரா இன்று சிட்னி டெஸ்டிலும் சதம் விளாசி அசத்தினார். முதல் நாள் ஆட்ட முடிவில் இந்தியா 4 விக்கெட் இழப்பிற்கு 303 ரன்கள் சேர்த்திருந்தது. புஜாரா 250 பந்தில் 130 ரன்கள் சேர்த்து களத்தில் இருந்தார்.

இன்று தொடர்ந்து ஆடிய புஜாரா சிறிது நேரத்தில் 150 ரன்களைக் கடந்தார். உணவு இடைவேளையின்போது இந்திய அணியின் ஸ்கோர் 5 விக்கெட் இழப்பிற்கு 389 ரன்கள் எடுத்திருந்தது. புஜாரா 181 ரன்களுடன் இரட்டை சதத்தை நோக்கி பயணித்தார்.

உணவு இடைவேளைக்குப்பிறகு அணியின் ஸ்கோர் 400 ரன்னைத் தாண்டியது. உற்சாகத்துடன் பந்துகளை பறக்க விட்ட புஜாரா இன்று தனது நான்காவது இரட்டை சதத்தை பதிவு செய்வார் என்று எதிர்பார்க்கப்பட்டது. ஆனால், 193 ரன்களில் ஆட்டமிழந்தார். 373 பந்துகளில் 22 பவுண்டரிகளுடன் அவர் இந்த இலக்கை எட்டினார். அவரது விக்கெட்டை லயன் கைப்பற்றினார். 7 ரன்களில் புஜாரா தனது இரட்டை சதத்தை தவறவிட்டதால் ரசிகர்கள் ஏமாற்றம் அடைந்தனர்.

இரட்டை சதத்தை தவறவிட்டபோதிலும், இந்த போட்டியின்போது பல்வேறு சாதனைகளை எட்டியுள்ளார் புஜாரா.

Leave a Reply

Your email address will not be published. Required fields are marked *